-
लिरगिरिनि सिनायथि
मुस्त्रिमा किरण बिथाडा बाक्सा जिल्लानि बरिमाखा दख 'रानि दाडरमाखा गामियाव रबिबारनि फुंबिलिआव (5 बाजिनि आगोल) आसार दाननि दाइन खालारखालि 1983 इं मायथाइयाव बिमा भबानि रामसियारि आरो बिफा नरेन रामसियारिनि गोरबोआव जोनोम लाना बुहुमाव आगान होफैयो । बिथाडा थाखो स्नि (1994) आव फरायबाय थानाय समनिफ्रायनो थुनलाइआव रेबगन हमजेनो।1995 मायथाइनिफ्राय सुंद'सल लिरनो सोलोडो। 1996 मायथाइनिफ्राय थुनलाइ सिबिनायाव गोसो बोयो । दासान्दि बिथाडा गोबां रोखोमनि खनथाइ लिरखांबाय। "खोमसि अखाडाव जोनाय थरसे अलंबार" बे खनथाइ बिजाबा बिथांनि गिबि सोरजि । बिथाडा रमानटिक लिरनो जोबोर मोजां मोनो । बिथाडा बरमा कलेजाव बि.ए. नैथि बोसोरसिम फरायो। बिथाडा 2003 मायथाइयाव रडियानि केकहाति गामिआव दिल्ली पुलिस मानिक बर' (ASI) जों हाबा जाहैयो । बिथाडा 2019 मायथाइनिफ्राय थुनलाइ सिबिनायाव गोसो होफिनो । खनथाइ बिबार हान्जानि गुबुन गुबुन आयदानि अनलाइन खनथाइ लिरनाय बादायलायनायाव बाहागो लानानै बिथाडा खेबनै 'सेथि' आव आरो खेबसे 'नैथि' आव देरहानो हायो । आथिखालाव बिथाडा दिल्ली बर' थुनलाइ आफादनि आखान्थि नेहाथारि आरो दिल्ली बर' बाथौ गौथुमनि थुनलाइयारि बिफाननि नेहाथारि। खुलुमबाय ।
खोमसि अख्राङाव जोंनाय थरसे अलंबार किरण बर
किरण बर खोमसि अखाडाव जोनाय थरसे अलंबार
दोंसे लिरबिदां लिरनो थाखाय सासे लिरगिरिआ गोबां साननांगौ बुजिनांगौ जायो। माबेनिफ्राय जागायना माबेसिम फोजोबहैनांगोन। माबायदि सोदोबनि गहेनाजों देलायहोबा समायगोन, सोरजोंबा अनजागोन बाखनाय जागोन। आइजोफोरा जेरै गावनि सोलेरनि गाबा जियानो जा देलायनो मोजां मोनो। लिरगिरिनि आखलाबो बिदिनो। सासे लिरगिरिनि थांखियानो जाबाय गावनि सानस्रिफोरखौ थुनै थुनै थुनलाइआव अराय गोजोर आगर एरफबना साजायना नेरसोन दोनलांनाय।
खोमसि अख्राङाव जोंनाय थरसे अलंबार 2023 इं मायथाइ फेब्रुवारिआव आंनि बे गिबि दिहुनजेननाय गांसे खनथाइ बिजाब। बे बिजाबाव गासै दों गुजिदाइन (98 ) खनथाइफोर दं आरो आंनि उनदै समावनो लिरनाय खनथाइबो दोंनै दं। बे बिजाबाव थानाय खनथाइनि राव सोदोबफोरा गनाय जाथाव, गोजोनथाव जानो हाखोना हादिया आं मोनथिला जायखि जाया आं लिरनो मोजां मोनो, गुबुन लिरगिरिफोरनि फरायनोबो मोजां मोनो। लिरनानै थफ्ला बोनथुमना दोननो हायैनि गांसे खनथाइ बिजाबनि महर होबाय। दा बे बिजाबाव थानाय खनथाइफोरखौ फरायनानै मोजां मोननाय मोनै, जानाय जायैया आंनि खनथाइ बिजाबखौ फरायगिरि नोंथांमोननि बिजिरनायावसो। बेयाव थानाय दोंफ्रोम खनथाइआनो आंनि गोसोनि सानस्रिजोंसो सोरजिनाय उफ्रा बिजाब फरायनो आंहा उदां समखौनो मोना। बेनिखायनो आं दोंफ्रोम खनथायावनो बेसेन गोसा सोदोबनि गहेनाजों देलायफबहोनो रोङासै।
सासे हाबा जानाय आइजोनि थाखाय राफोद लिरगिरि जानाया गोरलै बाथ्रा नङा बे बाथ्राखौ जेसेबां हाबा जानाय लिरगिरि दं मोनथिगौ। अब्लाबो बर' थुनलाइखौ मोजां मोननानै मुलुगाव गोसारहोनो थाखाय हानथु दुलुनब्लाबो हानायसिम नाजायो। बे बिजाबाव थानाय खनथाइफोरखौ सुजुनाय समाव माब्लाबा गोबां बार रुथि सावनाय ओंखाम ओंख्रि भाजा एवनाय संनायाव खामफ्रुलांदों। फिसाइजो रायजागुबुदों। समा जियानो जा सोदोबफोरा गोसोआव एकथुना बेरफ्रावफैयोब्ला आं खामानि दोनथनाबाबो हाखु दाखु लिरनायमोन दाबो लिरो। मानो होनोब्ला समा बारगलांबा दाख्रायब्लाबो बै सानस्रिखौ गोसोखांना लिरफिननो हाया। बेनिखायसोना मा जाबाबो जायाबाबो आं गोबां खनथाइ सोरजिनो हादों। दा आंनाव गोदान गोजाम गोबां खनथाइ आरो सुंद'सल दं बिजाब दिहुननो खाबु मोनाखै। आं रमानटिक लिरनो उनदै समनिफ्रायनो जोबोर मोजां मोनो आरो गोबां रोखोमनि। सोरनिबा दुखु दाहाखौ नुनानै खनथाइ सुंद'सल लिरनायाबो आंनि मोनसे हुदा।
दिल्ली एनसिआर बर' थुनलाइ आफाद, मिरु बर' थुनलाइ आफाद, आंनि जोनोम जायगा बरिमाखा दख'रा आरो आंनिनो फोरोंगुरु सार मेदाममोननि आं गोबां थुलुंगा अननाय बोर मोननानै बे खोमसि अख्राङाव जोंनाय थरसे अलंबार मुंनि खनथाइ बिजाबखौ नोंथांमोननि सिगाङाव बेखेवनानै मोगथां महर होनो हादों।
बेनिखायनो आंखौ थुलुंगागिरि गासैबो सार मेदाम आदै मादै आदा आब' बाजैमोननिसिम आरो फरायगिरि नोंथांमोननिसिम आंनि गोसो गोरबोनिफ्राय गोथारै खुलुमनायजों गोबां खेब साबायखर बाउहरबाय ।
